Хождение Богородицы по мукам (оригинал)
ХОЖДЕНИЕ БОГОРОДИЦЫ ПО МУКАМЪ
Хоте святая Богородица помолитися къ Господу Богу нашему на горе Елионстей: во имя Отца и Сына и Святаго Духа, да снидетъ архангелъ Михаилъ, да повесть о муце небесней и о земней. Слово возвещавши, сниде архангелъ Михаилъ и 400 ангелъ съ нимъ: 100 отъ востока, 100 отъ запада, 100 отъ полудни, 100 отъ полунощь. И целова Благодатную Михаилъ со ангелы и рече: «Радуйся, Отче исполнение; радуйся, Сыновне пребывание; радуйся, Святаго Духа похвало; радуйся Христови... и утвержение; радуйся, Давидово проречение; радуйся, святое поклонение; радуйся, пророчьска проповедания; радуйся, превышняя всехъ у престола Божия».
Рече же Благодатная ко архангелу Михаилу: «Радуйся ты, архистратиже, первый воинъ, невидимаго Отца служителю и светильниче; радуйся, Михаиле, первый воинъства, Святаго Духа повеление; радуйся архистратиже, шестокрылству похвало; радуйся, Михаиле архистратиже, мучителемъ попрание, а престолу Владыкы достоино стоиши; радуйся, Михаиле, просвещения никакогоже угасая; радуйся, архистратиже, первыи воине, хотя вострубити и убидити отъ века умершая; радуйся, Михаиле, первыи всемъ небеснымъ силамъ, первыи же и до престола Божия вся ангели прославльшаго».
Богородица, хотящи, дабы видела, како ся душа мучать, и рече Михаилу архистратигу: «Исповемся, исповеждь ми, яже суть на земли всяческая». И рече к ней Михаилъ: «Яко же (...) речеши, Благодатная, азъ всяческая тебе исповемъ». И рече къ нему Святая Богородица: «Колко есть мукъ, идеже мучится родъ христьянскии?» И рече къ ней архистратигъ: «Неизрекомыи суть мукы». Рече же къ нему Благодатная: «Исповежь ми на небеси и на земли».
Тогда повеле архистратигъ явитися ангеломъ отъ полудне, и отверзеся Адъ, и виде во Аде мучащаяся, и бяше ту множество мужъ и женъ, и вопль много бяше. И воспроси Благодатная архистратига: «Кто си суть?» И рече архистратигъ: «Сии суть, иже не вероваша во Отца и Сына и Святаго Духа, но забыша Бога и вероваша юже ны бе тварь Богъ на работу сотворилъ, того они все боги прозваша: солнце и месяць, землю и воду, и звери и гади, то святеи человекы, камени ту устроя, Трояна, Хърса, Велеса, Перуна, но быша обратиша бесомъ злымъ и вероваша, и доселе мракомъ злымъ содержими суть, того ради зде тако мучатся...».
И виде на друземъ месте тму велику, и рече Святая Богородица: «Что сии есть тма сии, и кто суть пребывающи въ ней?» И рече архистратигъ: «Многи душа пребываютъ въ месте семъ». И рече Святая Богородица: «Да отымется тма сии, да быхъ видела и ту муку». И отвещаша ангели, стрегущии муку: «Пореченно есть, да не видять света, дондеже явится Сынъ твои благыи, паче 7 солнцъ светлийши». — И прискорбна бысть Святая Богородица, и ко ангеломъ возведе очи свои, и возревъ на невидимыи престолъ Отца Своего, и рече: «Во имя Отца и Сына и Святаго Духа, да отимется тма сии, и да быхъ видела сию муку». И отъятся тма си и 7 небесъ явися, и ту пребываше множство народу, мужъ и женъ, вопль многии бысть и гласъ велик (...) исхожаше.