«Живъ господь Богъ, имя его велико, 7-жды на день и 7 на нощь, егда хвалу приносимъ Владыце и за грешники, Госпоже, Господеви поклоняемся, да ни худе насъ послушаетъ владыка». И рече Пресвятая Богородица: «Молим ти ся, повели ангельскому воинству, и вознесете мя на высоту небесную и поставите мя предъ невидимымъ Отцемъ».
И повеле архистратигъ, и предсташа херувими и серафими, и вознесоша Благодатную на высоту небесную, и поставиша ю предъ невидимымъ Отцемъ у престола, и возде руце свои ко благодатному Сыну своему, и рече: «Помилуи, Владыко, грешныя, яко видехъ я, и не могу терпети, да ся мучю и азъ со крестьяны». И прииде гласъ къ ней, глаголя: «Како хощу тыя помиловати? А вижу гвоздия во дланехъ сыну моему, да не имамъ я како те помиловати». И рече: «Владыко, не молюся за неверныя жиды, но за крестьяны молю твое милосердие». И прииде гласъ, глаголя: «Азъ вижу, яко братия моея не помиловаша, да несть ми како техъ помиловати». И рече паки Пресвятая: «Помилуй, владыко, грешныя; помилуй, Господи, тварь руку своею, яко по всей земли твое имя нарицаютъ и въ мукахъ и на всякомъ месте, и по всей земли глаголюще: “Пресвятая Госпожа Богородице, помогаи намъ”, и егда ражается человекъ, и глаголетъ: “Святая Богородице, помози ми”». Тогда рече къ ней Господь: «Послушай, Пресвятая Богородице, Владычице, — несть того человека, иже не молить имени твоего; азъ же не оставляю техъ то ни на небеси, ни на земли».
И рече Пресвятая Богородица: «Где есть Моисеи пророкъ, где ли суть вси пророцы, и вы, отци, иже греха не сотвористе николиже; где ли Павелъ возлюбленикъ божий; где есть неделя, похвала христьянская; где ли есть сила честнаго креста, иже Адама и Евгу отъ клятвы избави?» Тогда Михаилъ архистратигъ и вси ангели рекоша: «Помилуй, Владыко, грешныя». Тогда Моисеи возопи, глаголя: «Помилуй, Владыко, яко азъ законъ твой дахъ имъ». Тогда Иоаннъ возопи, глаголя: «Помилуй, Владыко, азъ Евангелие твое проповедахъ имъ». Тогда Павелъ возопи, глаголя: «Помилуй, Господи Владыко, яко азъ епистолья твоя принесохъ церквамъ». И рече Господь Бог: «Послушайте вси вы: аще по Евангелию моему или по закону моему, и аще есть по евангельскому проповеданию, еже проповедаше Иоаннъ, епистольямъ, яже принесъ Павелъ, то тако судъ приимутъ, — имееши чсо ради рещи ангели, толико “Помилуй Господи — праведны еси”». И рече Пресвятая Богородица: «Помилуй, Владыко, грешныя, яко ти Евангелие прияша и законъ твой сохраниша». Тогда рече къ ней Господь: «Послушай, Пресвятая, аще кто техъ сотвори зло, но не каются ни отъ работы, да добре глаголеши, яко закону твоему поучишася, и паки сотвориша злое, егда не отдаша злаго, азъ что да реку, яко есть речено, подасть темъ противу злобе ихъ». Тогда вси святии, слышавше Владыку глаголюще, не смеша что отвещати.