Хождение Богородицы по мукам. Страница 7
И видевше Пресвятая, яко вси не успеша ничтоже и Господь святыхъ не послуша, но удаляетъ милость свою отъ грешникъ, и рече Пресвятая: «Где есть архистратигъ Гаврилъ, иже возвести мне, — радуися, якоже преже всехъ векъ внемляше Отца, — и ныне на грешники не призираеть; где есть велики, иже градъ носить на версе своемь и на единой земли, за неприязнена дела человеческая искаляна бысть земля, — и посла Господь Богъ Сына Своего и утверди плодъ земьныи; где суть служители престолу, где есть Иоаннъ Богословець? почто не явистеся съ нами на мольбу Владыце за крестьяныя грешники? Не видите ли мене плачющуся за грешныя? Приидете вси ангели и сущии на небесехъ; приидете вси праведнии, яже Господь оправди, и вамо дано есть молитися за грешныя. Прииди ты, Михаиле, — ты еси первый безплотнымъ и до престола Божия, — повели и всемъ, да припадемъ предъ невидимымъ Отцемъ, и не подвижемъ себе, дондеже послушаетъ насъ Богъ и помилуетъ грешныя». Тогда падеся Михаилъ ницъ лицемъ своимъ предъ престоломъ, и вся лики небесныя, и вси чини безплотныхъ. И виде Владыка молбу святыхъ, умилосердися Сына ради своего единороднаго, и рече: «Сниди, Сынъ мой возлюбленный, виждь молбу святыхъ, и яви лице свое на грешники».
И сшедъ Господь отъ невидимаго престола, и увидеша и во тме сущии, и возопиша вси единымъ гласомъ, глаголюще: «Помилуй ны, Сыне Божий; помилуй ны, цьсарю всехъ векъ». И рече Владыка: «Слышите вси, рай насадихъ и человека создахъ по образу своему и поставихъ и господина раеви, и животъ вечный дахъ имъ, они же ослуху створиша и въ своемъ хотении согрешиша, и предашась смерти; азъ же не быхъ хотелъ обозрити дела руку своею мучима отъ Диявола, снидохъ на землю и воплотихся во девицу, и вознесохся на крестъ, да свобожу ся отъ работы и отъ первыя клятвы; воды испросихъ, и даша ми желчи со оцетомъ смешено; руце мои создаста человека, и во гробъ вложиша мя; да и во Адъ снидохъ и врага своего попрахъ, избраны своя воскресихъ, Иорданъ благословихъ, да вы прощу отъ первыя клятвы, — и вы не брегосте покаятися греховъ своихъ, но крестьяне ся творяще словомъ точию, а заповедей моихъ не соблюдосте; да того ради обретостеся во огни негасимомъ, да не имамъ васъ помиловати. Ныне же за милосердие Отца моего, яко посла мя къ вамъ, и за молитвы матери моея, яко плакася много за васъ, и за Михаила архистратига завету и за множство мученикъ моихъ, яко многа трудишася за васъ, и се даю вамъ мучащимся день и нощь отъ Великаго четверга до святыя Пянтикостия, имете вы покои и прославите Отца и Сына и Святаго Духа». И отвещаша вси: «слава милосердию твоему».
Слава Отцу и Сыну и Святому Духу, и ныне и присно и во веки векомъ. Аминь.